தென்னிந்தியாவில் சிறுவர்கள் முதல் பெரியவர்கள் வரை அனைவரும் விரும்பி உண்ணும் உணவாக இட்லி இருந்தாலும், வீடுகளில் ஹோட்டல்களில் கிடைப்பது போன்று பஞ்சு போன்ற மென்மையான இட்லி செய்வது பலருக்கும் ஒரு சவாலான விஷயமாகவே காணப்படுகிறது. சில நேரங்களில் இட்லி கல்லு போலவோ அல்லது தட்டையாகவோ மாறிவிடுகிறது.
சரியான அளவுகளில் அரிசி, உளுந்து சேர்த்து, மாவு அரைக்கும் சிறுசிறு நுணுக்கங்களைத் தெரிந்து கொண்டால், எவரும் சுலபமாக மல்லிகைப்பூ போன்ற இட்லிகளைத் தயார் செய்ய முடியும். தரமான இட்லிகளைச் செய்வதற்குத் தேவையான பொருட்களையும், அதன் செய்முறையையும் இப்போது பார்க்கலாம் வாங்க.
தேவையான பொருட்கள் (Idli batter ratio):
- இட்லி புழுங்கல் அரிசி – 4 கப்
- முழு வெள்ளை உளுந்து (குண்டு உளுந்து) – 1 கப்
- வெந்தயம் – 1 தேக்கரண்டி
- அவல் (அ) ஜவ்வரிசி – ஒரு கைப்பிடி அளவு
- கல் உப்பு – தேவையான அளவு
- ஐஸ் தண்ணீர் – மாவு அரைக்கத் தேவையான அளவு
செய்முறை!
முதலில் இட்லி அரிசியை மூன்று முறை நன்றாகக் கழுவி, சுத்தமான தண்ணீர் ஊற்றி சுமார் ஐந்து மணி நேரம் ஊறவைக்க வேண்டும். மற்றொரு பாத்திரத்தில் முழு உளுந்து மற்றும் வெந்தயத்தைச் சேர்த்து நன்றாகக் கழுவி, அதையும் ஐந்து மணி நேரம் ஊறவைக்க வேண்டும். இட்லி கூடுதல் மிருதுவாக வருவதற்கு, மாவு அரைப்பதற்கு அரை மணி நேரத்திற்கு முன்பு, ஒரு கைப்பிடி அளவு அவல் அல்லது ஜவ்வரிசியைத் தண்ணீரில் ஊறவைத்துக் கொள்ள வேண்டும்.
பக்குவமாக மாவு அரைத்தால் மட்டுமே பஞ்சு போன்ற மென்மையான இட்லி கிடைக்கும். மாவை மிக்ஸியை விட கிரைண்டரில் அரைப்பது சிறந்த முடிவுகளைத் தரும். முதலில் ஊறவைத்த உளுந்து மற்றும் வெந்தயத்தை கிரைண்டரில் சேர்க்க வேண்டும்.
அரைக்கும் போது சாதாரண தண்ணீருக்குப் பதிலாக ஐஸ் தண்ணீர் தெளித்து அரைப்பது மிகவும் முக்கியம். இது மாவு சூடாவதைத் தடுத்து, உளுந்தை நன்றாகப் பொங்கச் செய்யும். உளுந்து வெண்ணெய் பதத்திற்கு வந்தவுடன், அதை ஒரு பாத்திரத்தில் மாற்றிக் கொள்ள வேண்டும்.
அடுத்ததாக, ஊறவைத்த அரிசி மற்றும் அவலைச் சேர்த்து அரைக்க வேண்டும். அரிசி மாவு மிகவும் மைய அரைபடாமல், ரவை பதத்திற்குச் சற்று முன் கொரகொரப்பாக இருக்க வேண்டும். அரைத்த அரிசி மாவையும் உளுந்து மாவுடன் சேர்த்து, தேவையான அளவு கல் உப்பு இட்டு, உங்கள் கைகளால் நன்றாகக் கலந்து விட வேண்டும். கைகளால் பிசையும் போது ஏற்படும் உடல் வெப்பம், மாவு சீக்கிரமாகப் புளிக்க உதவி செய்யும். இந்த மாவை சுமார் 8 முதல் 10 மணி நேரம் வரை புளிக்க வைக்க வேண்டும்.
மாவு நன்றாகப் புளித்து மேலே பொங்கி வந்தவுடன், அதனை மிகவும் வேகமாகப் கலக்காமல், மிதுவாகக் கரண்டியால் கலந்து கொள்ள வேண்டும். இட்லித் தட்டுகளில் சிறிதளவு நல்லெண்ணெய் தடவி, மாவை ஊற்றி, இட்லிப் பானையில் மிதமான தீயில் 10 முதல் 12 நிமிடங்கள் வரை ஆவியில் வேகவைக்க வேண்டும்.
வெந்தவுடன் உடனடியாக எடுக்காமல், இரண்டு நிமிடங்கள் ஆறிய பிறகு எடுத்தால், தட்டில் ஒட்டாமல் அழகாக வரும். மேற்கூறிய குறிப்புகளைப் பின்பற்றி மாவு அரைத்தால், உங்கள் வீட்டிலும் சுவையான மற்றும் மென்மையான இட்லி சுலபமாகத் தயார் செய்யலாம். இதனைச் சூடான சாம்பார் மற்றும் காரச் சட்னியுடன் பரிமாறி மகிழுங்கள்.
